كـيف اتعـامل مع مختلف مهارات مـادة اللغة الأنجليزية فـ الفاينل ؟

 مهارات مـادة اللغة الأنجليزية فـ الفاينل الاختبارات النهائية .. جميع صفوف العاشر والحادي عشر والثاني عشر 

الأنجليزي فـ ٤٠ دقيقة

تعرف ايش اتدرسوا باكر ، لو كان قصة نص اي شي اقرأ أول مره و حدد على الكلمات اللي م فهمتها ، بعدين ترجمها ، ثاني مره تقرأ و انت عارف المعاني خلاص تكون كذا ذاكرت و إذا شي اسئلة تحت الفقره حااول تحلهن شي اتعرف تحله و شي لا بس حااول ، لو كانت قاعده شوف مقطع ف اليوتيوب عنها و ابحث عن امثله تطبيقية و إذا شي تمارين ف الكتابين جرب تحلهن ، عاد هنا تجلس تنتظر الحصة متى تجي لأن انت مذاكر 😂💪🏻، اذا حصة كتابة اعرف نوع الرايتنج اللي تكتبوا عنه و اذا تعرف الموضوع بعد حلو جرب تجمع افكارك حول الموضوع عشان تستعد للحصة - وااجد تدرب على الرايتنج و اعطي المعلم يصحح لك ، بالتدريب تكتشف اخطائك و تعدلها - .

📍الأستمــاع :

الأستمـاع عندنا نوعيـن ( تظليل الأجابة الصحيحة / كتابة الأجابة الصحيحة ) , مهم نعرف فـ النوع الثاني ما يحاسبوا على الكتابة الصحيحة أهم شي يكون قريب من الأجابة 🌟'

الأستمـاع يكون مرتين لذلك يجب استغلهن بـ ذكـاء ، قبل م يجي المعلم / المعلمة و يشغلوا الأستماع عندنا مجموعة خطوات لازم نتبعها :
1. نعرف نوع الأستماع + موضوعة
2. نقرأ جميع الأسئلة و جميع الأجابات
3. أمـام كل سؤال نكتب المطلوب ( هل بيكون رقم , اسم شخص , اسم مكـان … إلى آخره )
4. نترجم جميع الأجـابات الموجودة ( هذا ابدًا ما يعني أن أنت ما فاهم الأنجليزي أو ما متمكن منه بالعكس هذا بيقلل توتر و بيقلل وقت لمّـا تبحث هن الأجابة ).
5. نحط دائرة على الكلمة المفتاحية فـ السؤال و "نترجمهاا ".

لمّا يبـدأ الأستمـاع :

نخلـي كل كل تركيزنا فـ اللي ينقال و عيوننا على الورقة و الاسئلة ننتقل بينهن و نحط خط تحت الأجابة الصحيحة اللي سمعناها أول مره .
‼️ لـيشش خط و ما نظلل على طول !!
لأن ممكن أنت ما سمعتها صح و بتسمع الصح فـ ثـاني مرة و هناا قد يبقى أثر التظليل و يتم معاملتها على انها إجابة خطأ 🤷🏻‍♀️.
🔺 أحيـانًا فـ أول مره نسمع فيها نشك بين أجابتين فـ حطوا تحتهن خط بـ ٢ و حطوا دائرة على رقم السؤال ، عشـان فـ المرة الثانية نسمع فيها نركز تركيز مضاعف على هـذا السؤال و ما ننسـى نتأكد من باقي الاجابات .

< آخر شيء لا تنسـوا تظللوا الأجابة الصحيحة بطريقة صحيحة ✔️🌟' >

* بالنسـبة لأسئلة الأكمـال بالإجابة الصحيحة نعاملها نفس الطريقة , فقط يفرق إن هنا ما شي إجابات لذلك حاولوا كثر ما تقدروا تسمعوا السبيلنج صح .

➕ اللي يتلخبط أحيانًا فـ كتابة الأرقام ( السنوات مثلاً )  حسب ما يسمعها , يتدرب علـى هذا الشي قبل ما يدخل الأختبار .

📍الرايتنج

أول خطـوة و أهم خطوة نشوف نوع الرايتنج فيهاا و نكتبه فـوق داخل مستطـيل ( تجنبًا لأي خطأ ) ، هنا نبدأ نسترجع ايـش مكونات هذا النوع من الرايتنج ( مثلاً المقدمة - الموضوع - الخاتمة ) ، و نكتب جنب النوع ايشش زمن الفعل اللي المفترض نستخدمه .
ننتقل للموضوع نفسه ، نسوي عصف ذهني للموضوع و نجمع افكارنا حوله و نكتبها فـ ورقة خارجية ( غالبًا يكونوا متساهلين و لو طلبتوا ورقة يعطوكم , و لو ما صار كتبوا فـ المسودة ) , بعدين بسم لله نبدأ نكتب .
ملاحظة : أغلب الطلاب فاهمين إذا استخدمت جمل معقدة بيعطوني درجات أكثر 🥲💔 , لااا لاا ابدًا ما كذا نحاول نكتب جمل قصيرة متكاملة التركيب - هذا أهم شي - , هم يحاسبوا على تركيب نوع الرايتنج + الأخطاء الأملائية + ترتيب الأفكار و تكاملها .

شخصيًا كنت اكتب جمل بسيطة جدًاا و قليل اسوي جمل طويلة عشان اتجنب الأخطااء و اضمن درجاتي .

📍 الريدنج

 انصحكم قبل تقريوا الاسئلة قبل النص نفسه و تحددوا ايش المطلوب من كل سؤال و تكتبوهه جنب السؤال بالعربي + حطوا دائرة على الكلمة المفتاحية , بعدين تنتقلوا لـ النص نفسه و تقريوا , هُنـا خلاص عقلكم بيكون مستعد يبحث عن الأجابات و لما تقريوا بتمر عليكم الأجابات المحتملة حطوا تحتها خط و كتبوا فوق رقم السؤال , من تخلصوا النص كاامل نرجع نشوف كل سؤال مع الأجابة اللي حددناها و لو بعده ما اقتنعت بالأجابة ارجع اقرأ النص فـ مدى السؤال نفسه ( غالبًا غالبًا الأجابات موجودة بالترتيب )

📍الكلمـات / القواعد

🔺 الكلمات ابـدًا ابـدًا ما بتخرج عن المدروس و الموجود فـ الكتب لذلك مهم مهم تتابعوهن أول بـ أول و تجمعوهن نفس ما ذكرت قبل كل ثيم بنفسه , حاولوا تفهموا الفقرة الموجودة و شوفوا كل فراغ ايش يناسبه ( فعل , اسم , صفة … ) , بعد ما نقرأ و نحدد ننتقل للأختيارات الموجودة و نحذف اللي نشوفه مستحيل يناسب ( كذا تقللوا التشتت بين ٤ إجابات ) .
بعد ما تختاروا الإجابة رجعوا قريوا الفقرة مع الكلمات هل مُتناسبة مع اختياركم أو لاا !!

🔺 القواعد بتكون شـاملة لـ قواعد الأنجليزي ( القواعد الأساسية اللي درستوهاا - جمع قواعد تصريفات الأفعال و الجملة الشرطية - , القواعد اللي درستوها فـ الفصل نفسه ) , لذلك مهم جدًاا قبل ما ندخل نكون على علم فيها كلهاا و فاهمين تركيبة الجملة لـكل قاعدة و لو شي كلمات مفتاحية بعد بتساعدكم واجد  ( القواعد بسيطة لا تخافوا ) .